Firewall persoal

Existe un gran número de ofertas no mercado. Nalgúns casos, os produtos son gratuítos para usuarios particulares e de pago só para empresas. A maioría das empresas que desenvolven e manteñen antivirus tamén dispón destes produtos. En caso de dúbida, póñase en contacto co seu provedor habitual de software.

Para instalar un firewall persoal, en primeiro lugar é preciso asegurarse de que non existe ningún outro xa instalado. A instalación de dous firewall persoais non aumenta a seguridade, senón que xera erros e conflitos entrambos.

Ademais das preguntas habituais de instalación, o firewall persoal normalmente solicitaralle que seleccione un nivel de seguridade entre baixo, normal e estrito. Recoméndase usa-lo nivel de seguridade normal, a menos que sexa un usuario experto, en cuxo caso recoméndase o nivel de seguridade estrito.

Durante os primeiros días de funcionamento, o firewall persoal enviaralle moitas mensaxes. Estes avisos serán fundamentalmente de dous tipos:

Peticións de conexión de programas: ó usar un programa, normalmente establécense conexións a Internet. O firewall persoal detectará esta conexión e advertirá ó usuario.

Ataques detectados: o sistema advertirao de que o seu sistema está sendo atacado. A frecuencia dos ataques pode chegar a ser de ata 3 ou 4 por hora. No hai ningún motivo para alarmarse; a maioría das veces trátase de ataques que se dirixen a redes enteiras e que non afectan a ningunha máquina. Son intentos de ataque sen éxito dos que lle informa o firewall persoal.

En calquera destes casos, o firewall persoal pode volver avisar ou só rexistra-lo ataque, segundo a opción que vostede escolla. É dicir, no caso de que se produza outro acceso, volverá avisalo ou, pola contra, repetirá a última orde que désemos.

Recoméndase empregar tódolos programas con conexión á rede dispoñibles durante os primeiros días, ata que non haxa mensaxes de aviso e o firewall persoal os teña todos rexistrados.

Ocorrerá o mesmo no tocante ós ataques. Os primeiros días amosarase un número moi elevado de ataques que irá diminuíndo progresivamente.